Söhbət

_MG_9613 feature

Sərxan Musalı: “12-13, yaxud hətta 15 medal qazana bilərik”

_MG_96

Suallarımızı «Futbol +” qəzetinin əməkdaşı Sərxan Musalı cavablandırdı.

– Sərxan müəllim, Rio-de Janeyro Olimpiadası başlanır. Bu Olimpiada bizim idmançılarımız üçün ən çətin yarışlardan biri olacaq. Həm iqlim şəraiti, həm vaxt fərqi idmançılarımızın əleyhinə olacaq. İdmançılarımız bu şərtlərlə necə mübarizə aparacaqlar?

– Bu suallar hələ təşkilatçılıq hüququ Braziliyaya veriləndə yaranmışdı. Həm də yalnız Azərbaycanda yox, bütün Avropa ölkələrində. İqlimə və saat fərqinə uyğunlaşmaq üçün vaxt tələb olunur. Bu problemi həll etmək üçün əksər ölkələr bir neçə gün qalmış idmançılarını Rioya yola salıblar. Mənə elə gəlir ki, müəyyən qədər bu şəraitə uyğunlaşmaq üçün 1 həftə vaxt kifayətdir. Bir müddət öncə İranın paralimpiya yığması Azərbaycanda toplanışa gəlmişdi. Komandanın baş məşqçisindən müsahibə götürəndə o, dedi ki, Bakının iqlimi bir qədər Rionun iqliminə oxşardır. Hər iki şəhərdə hava çox tez-tez dəyişir. Əgər həqiqətən belədirsə, məncə, idmançılarımız üçün çox da çətin olmamalıdır. Bir neçə gün əvvəl yola düşdüklərindən, düşünürəm ki, idmançılarımız vaxt fərqinə də öyrənəcəklər. Nəzərə almaq lazımdır ki, şərait hamı üçün eynidir.

– Ilk dəfədir ki, biz Olimpiya oyunlarında 18 idman növü üzrə 56 nəfərlə təmsil olunuruq. Hər bir Olimpiya oyunundan əvvəl medal planları açıqlanır. Bu oyunlardan neçə medal gözləyirik?

– Bu yaxınlarda Milli Olimpiya Komitəsinin vitse-prezidenti Çingiz Hüseynzadə mətbuat konfransı keçirdi və qeyd etdi ki, MOK bu yarışlardan ən azı 12-13 medal gözləyir. 1996-cı ildən üzü bəri Olimpiya oyunlarında medalların sayında ədədi silsilə üzrə artım gedir. Müvafiq olaraq 1, 3, 5, 7 medal qazanmışıq. 2012-ci ildə 9 medal gözləyirdik, amma 10 medal qazandıq. Bu il isə həm iştirakçı, həm də iddialı idmançılarımızın sayı artdığından, 12-13, yaxud hətta 15 medal qazana bilərik. İlk növbədə isə ümumi sıralamada yüksək yerlər tuta bilməyimiz üçün medalların əyarlarını yüksəltməliyik. Tutaq ki, 3 qızıl 15 bürüncdən daha yaxşıdır.

– Rusiya idmançıları ilə bağlı dopinq qalmaqalı müəyyən sayda rus idmançısının əsasən ağır və yüngül atletika idman növlərində Olimpiya oyunlarına qatılmasının qarşısını aldı. Bu hal bizim medal şanslarımızı artıra bilərmi?

– Məsələ ondadır ki, pusların cəzalandığı ağır atletika növündə bizim də bəzi idmançılarımız oxşar səbəbdən cəzalandırılıb. Yüngül atletika növündə isə bizim iddialı idmançılarımız yoxdur. Ona görə də bunun idmançılarımızın çıxışına təsiri demək olar ki, olmayacaq. Əgər boks və güləş növlərində onlar buraxılmasaydı, şanslarımız daha çox olardı.

– “Azərbaycan” qəzetinin son saylarından birində Olimpiya oyunlarında iştirak edən Azərbaycan komandasının üzvlərinin adları və foto-şəkilləri verilib. Burada milliyyətcə Azərbaycan doğumlu olmayan xeyli idmançılar var. İdman ictimaiyyətinin buna bənzər məsələlərə münasibəti necədir?

– Legioner idmançılar bir çox ölkələrdə var. Amma Azərbaycanda bu məsələdə bir qədər ifrata varıblar. Bu məsələni biz öz qəzetimizdə dəfələrlə işıqlandırmışıq və mənfi münasibətimizi bildirmişik. Azərbaycan komandasının az qala yarısı legionerlərdən ibarətdir. Düzdür, valideynlərindən biri azərbaycanlı olanları, yaxud əslən Cənubi Azərbaycandan olan idmançıları istisna edə bilərik. Hətta bəzən qəribə hallarla da rastlaşırıq. Güləş milli Azərbaycan idman növüdür. Lakin bu idman növündə də komandamızın üzvləri arasında əslən Dağıstandan olan idmançılar var. Bu bir növ asan uğur qazanmaq yolu kimi dəyərləndirilir.

Biz nədənsə çalışırıq ki, bizdə tarixən ənənəsi olmayan idman növlərində də təmsil olunaq. Halbuki ölkəmizdə potensialı olan idman növlərini inkişaf etdirmək daha yaxşı olardı.

– Görünür, bunun əsas səbəbi medal artımındakı tendensiyanı saxlamaqdır. Yəqin idman federasiyaları arasında da hansısa rəqabət gedir.

– Sözsüz ki, elədir. Bu proses əsasən 2008-ci ildən sonra başlanıb. O vaxta kimi öz idmançılarımız medal qazanırdı. 2012-ci ildə isə legionerlər yerli idmançılardan daha çox medal qazandılar. Güman ki, bu il də belə olacaq. Yeri gəlmişkən, Azərbaycan medalçılara veriləcək mükafat fonduna görə Olimpiadada iştirak edən ölkələr arasında Sinqapurdan sonra ikinci yerdədir.

– Ənənəvi olaraq biz güləş və boksdan medallar gözləyirik. Başqa hansı idman növlərində uğurlu çıxşa ümidimiz var?

– Bu dəfə başqa idman növləri də iddialı idmançılar yetişdirib. Güləş və boks bu baxımdan yenə öndə olacaq, amma taekvandoda da nəhayət Olimpiya medalı gözləyirik. Bu növdə dəfələrlə dünya və qitə çempionlarımız olub, amma Olimpiya mükafatçımız yoxdur. Taekvandoda təmsilçilərimiz ən azı 3-ü medal qazana bilər. Cüdoda Rüstəm Orucovun Elnur Məmmədlinin uğurunu davam etdirəcəyinə ümid edirəm. Təbii ki, Orxan Səfərov və Elmar Qasımov da iddialı idmançılardır. Avarçəkmədə xüsusilə Radomskayadan uğur gözləmək olar. Gimnastikada Oleq Stepko medal ümidlərimizdəndir.

– Azərbaycanın idman jurnalistlərinin bu cür nəhəng idman yarışlarını işıqlandırmalarını qənaətbəxş sayırsınızmı? Məsələn, təmsil etdiyiniz “Futbol+” öz nümayəndəsini Rioya göndəribmi?

– Təəssüf ki, bu gün Azərbaycan jurnalistikasında maliyyə durumu yaxşı olmadığından, redaksiyalar öz işçilərini idman yarışlarına ezam etmək gücünə malik deyillər. Nəzərə almaq lazımdır ki, Braziliya kimi uzaq bir ölkəyə 16 günlük səfər böyük xərc tələb edir. Dövlət xətti ilə isə 10 jurnalist aparılıb, lakin onların heç də hamısı idman jurnalisti deyil. Azərisport.com, apasport.az, “Futbol+” kimi sayt və nəşrlər isə kənarda qalıb.

_MG_9631

– Azərbaycanda idmanla maraqlanmaq və azarkeşlik ənənələri daha çox və əsasən futbol və əlbəyaxa döyüş növləri müstəvisindədir. Tutaq ki, velosiped, qılıncoynatma kimi idman növlərinin ənənəsi yoxdur. Buna görəmi həmin idman növlərinə maraq yoxdur?

– Ənənələr həqiqətən böyük rol oynayır. Həm də uğurlu nəticələrin olduğu idman növləri daha çox azarkeş cəlb edir. SSRİ dövründə bizdə qadın voleybolunun ənənəsi olub. Ona görə də 2000-ci illərdə “Azərreyl” qadın voleybol klubunun çıxışları zamanı idman sarayı azarkeşlərlə dolub-daşırdı. Uğurlar azaldıqca isə bu azarkeş dəstəyinə öz təsirini göstərdi. İnsanlarımız həm də yerli idmançıların çıxış etdikləri idman növlərinə diqqət yetirirlər. Legionerlərin çıxışlarına maraq isə böyük deyil. Ənənəsi olmayan idman növlərini kütləviləşdirmək də böyük zəhmət tələb edir.

– Belə bir təsəvvür də var ki, bizim üçün ekzotik olan idman növlərinin populyarlaşdırılması üçün insanların maddi imkanları da yaxşı olmalıdır.

– Təbii ki, iqtisadi səbəblər böyük rol oynayır. Hətta elə insanlar var ki, ailə vəziyyəti ilə əlaqədar olaraq bazar günləri də çalışırlar və onlardan hansısa idman növü ilə məşğul olmağı, yaxud idman yarışlarında azarkeşlik etməyi gözləməyə dəyməz.

– Azərbaycan regionlarında xeyli Olimpiya idman kompleksləri tikilib. Bir idman jurnalisti kimi həmin idman komplekslərinin faydalı iş əmsalını hiss edirsinizmi?

– Bu da bizim yaralı yerimizdir. Çünki olimpiya kompleksləri iki yerə bölünür. Bəziləri təsərrüfat hesablıdır və özlərini dolandırmaq üçün oradakı idman bölmələri pullu xidmət göstərirlər. Hətta adi insanların hovuzdan istifadəsi də pulludur. Həmin komplekslərdə idmançıların üzə çıxması çətin məsələdir. Bölgələrdə insanların öz övladlarını pullu idman bölmələrinə yazdırmaq imkanları məhduddur. Əslində isə nazirliyin və MOK-un balansındakı idman kompleksləri tam təmənnasız xidmət göstərməlidir. Amma nəzarət zəif olduğundan sui-istifadə halları var. Özəlləşdirilən komplekslər isə uzun müddət fəaliyyət göstərə bilmirlər.

– Sizinlə bağlı sualımız da var. Necə oldu ki, idman jurnalistikasına gəldiniz?

_MG_9607

– Etiraf edim ki, ixtisasım idman jurnalistikası ilə bağlı deyil. Amma mənim bu sahəyə gəlməyim sırf idmana olan marağımla bağlıdır. Qardaşım “Futbol+” qəzetində futbol yazarı kimi fəaliyyət göstərirdi. Qəzetə digər idman növləri ilə bağlı olan yazar lazım idi. Qardaşım da mənə özümü sınamağı təklif etdi və 2011-ci ildən bu sahə ilə məşğulam. Bu gəlirli sahə deyil və idman jurnalistikasında çalışanlar yalnız fədakarlardır. Bizdə digər idman növləri futboldan fərqli olaraq bir o qədər də işıqlandırılmır.

– Biz bir çox məsələlərdə ermənilər və Ermənistanla müqayisə aparırıq. Ermənistanda idman hansı səviyyədədir?

– İdmanda əlbəttə ki, maliyyə durumu çox önəmlidir. Obyektivlik naminə deyim ki, müəyyən növlərdə ermənilərin də yaxşı idmançıları var – xüsusilə boksda və ağır atletikada. Azərbaycan iki idman növündə Ermənistandan geri qalır – ağır atletika və şahmatda. Qalan bütün növlərdə Azərbaycan çox güclüdür və bunu Olimpiadalardakı nəticələr də göstərir. Antantadan sonrakı bütün Olimpiya oyunlarında Azərbaycan aşkar fərqlə Ermənistandan üstün olub. Son Olimpiadada biz 30-cu idiksə, ermənilər 70-ci və ya 78-ci yerdə qərarlaşmışdılar.

Fuad Babayev, Gündüz Nəsibov, 1905.az

 

12747249_811783818947258_88883554067154263_o feature

RETROSPEKTİVA – Namiq Mayılov: “Reket jurnalist “ASAN xidmət”dən niyə rüşvət istəmir?”

12747249_811783818947258_88883554067154263_o

Suallarımızı 10 yaşlı “Region+” jurnalının baş redaktoru Namiq Mayılov cavablandırır.

– Namiq müəllim, ciddi jurnalı yaşatmağın əsas düsturu nədir?

– Jurnallarda qəzet və saytlardan fərqli olaraq müəyyən ixtisaslaşma gedir. Sayt siyasətdən tutmuş mədəniyyətə, idmana kimi bütün sahələri əhatə edə bilər. Sayt rəhbərliyi xəbər bolluğunda hansı məlumatı istəsə yerləşdirə bilər. Jurnalın isə bu baxımdan imkanları məhduddur. Onun tutduğu yol ixtisaslaşmasından asılı olacaq. Tutaq ki, analitik jurnal nəşr etdirirsinizsə, burada artıq kriminal həyatdan belə yazanda da analitik yanaşma nümayiş etdirməlisiniz. Təbii ki, analitik yazıların oxucu auditoriyası nisbətən az olur və bu tendensiya bütün dünyada özünü göstərir. Ona görə də əyləncə, şou mövzusunda yazan jurnalla ayaqlaşa bilməzsiniz. Birincisi, istiqamətlər fərqlidir, ikincisi də sırf bazar subyekti kimi baxanda, onun gəliri və auditoriyası səninkindən yüksək olacaq. Bunu hesablayaraq, işini elə qurmalısan ki, öz auditoriyanı yığıb, onu qoruyub, saxlaya biləsən.

Akif Asirli future

RETROSPEKTİVA – Akif Aşırlı: “Ən yaxın zamanlarda bir sıra qəzetlərin bağlanmasının şahidi olacağıq.”

Akif Asirli

1905.az portalının suallarını “Şərq” qəzetinin baş redaktoru Akif Aşırlı cavablandırır.

– Əlavə təqdimata ehtiyacı olmayan “Şərq” qəzeti Sizin adınızla bağlıdır. 2016-cı ilin fevralınadək “Şərq” qəzeti hansı yolu, mərhələləri keçib? Və yaxın perspektivi necə təsəvvür edirsiniz?

– “Şərq” qəzeti 1996-cı ildən çap olunur, bu il fəaliyyətimizin 20 illiyi tamam olacaq. Həmin dövrdə Azərbaycanda böyük mətbuat bumu var idi. Siyasi partiyalar çox ciddi fəaliyyət göstərirdi. Əlbəttə, həmin partiyaların da qəzetləri bazara çıxırdı. Ayrı-ayrı yaradıcı insanlar da öz qəzetlərini buraxırdılar. Hər gün qəzet köşkündə yeni bir qəzet görünürdü. “Şərq” qəzeti məhz belə bir dönəmdə nəşr olunmağa başladı. Biz “7 gün” qəzetində çalışan bir qrup adam daha müstəqil, keyfiyyətli, maraqlı qəzet buraxmaq qərarına gəldik və düşündük ki, siyasi qüvvələrdən müəyyən bir məsafə saxlamaqla bunu həyata keçirmək mümkündür. O dövrdə yetərli oxucu bazarı və azad sözə böyük tələbat da var idi. Qəzeti də sırf oxucu marağına və sırf satış imkanlarına söykənərək nəşr etdirdik. Şübhəsiz ki, bizə dəstək verən insanlar da var idi və qəzet özünün ən yüksək inkişaf dövrünü 2000-ci ilədək yaşadı. 2000-ci ildən sonra latın qrafikasına keçid bizim üçün müəyyən  çətinliklər törətdi. Çünki oxucularımızın müəyyən bir hissəsi orta yaş təbəqəsinə malik insanlar idi. Onlar əsas etibarilə kiril qrafikasında oxuduqlarından, latın qrafikasına keçid bizim oxucularımızın sayına öz təsirini göstərdi. Birdən-birə tirajımızda xeyli enmələr oldu. Sonrakı siyasi proseslər, mətbuata qeyri-peşəkarların gəlməsi, sui-istifadə halları, qeyri-peşəkarlara cəmiyyətin mənfi münasibətinin formalaşması da bizim işimizə öz təsirini göstərdi. Qəzetimizin tirajı 29-30 mini ötürdü, satış imkanlarımız 80 faizdən artıq idi.

Xaqani Seferoglu future

RETROSPEKTİVA – Xaqani Səfəroğlu: “Tez-tez qəzet baş redaktorlarının internet KİV barədə qəzəbli açıqlamalarını oxuyuram”

Xaqani Seferoglu

1905.az portalının suallarını “Yeni Media Jurnalistləri” İctimai Birliyinin sədri,  strateq.az saytının redaktoru Xaqani Səfəroğlu cavablandırır.

 – Xaqani müəllim, 2012-ci ildə “Yeni Media Jurnalistləri” İctimai Birliyinin təsis yığıncağı keçirildi və Siz də təşkilatın sədri seçildiniz… Xeyli vaxt keçir. Gördüyünüz, görə bildiyiniz və hansısa səbəblərdən gerşəkləşdirə bilmədiyiniz işlər barədə nə deyə bilərsiniz?

– “Yeni Media Jurnalistləri” İctimai Birliyi 2012-ci ildə təşəbbüs qrupunu yaradıb və niyyətini elan edib. 2013-cü ildə isə təşkilat kimi yaradılıb. Təşkilatın məqsədi internet media sahəsində çalışan jurnalistlərin bir araya gətirmək olub. Müxtəlif saytlarda işləyən internet jurnalistləri təşkilatın üzvləridir. Biz qurumu yaradarkən ölkənin media müstəvisində yenicə təşəkkül tapan onlayn media seqmentində problemləri öyrənmək, təklifərlə çıxış etmək və bununla bağlı marifləndirici tədbirlər keçirmək olub. Bu illər ərzində internet media ilə bağlı bir sıra təkliflərlə çıxış etmişik. İlk dəfə olaraq KİV haqqında qanunda internet media ilə boşluğun olduğunu deyərək müvafiq dəyişikliklərə ehtiyac olduğunu vurğulamışıq. Bundan savayı, onlayn media ilə bağlı bir sıra təkliflərimizi hazırlayaraq Mətbuat Şurasına təqdim etmişik. Bu illər ərzində internet media ilə bağlı bir sıra konfranslarda, toplantılarda iştirak etmişik, fikirlərimizi açıqlamışıq. “Yeni Media Jurnalistləri” ilk olaraq ölkədə İnformasiya Təhlükəsizliyi haqqında qanunun qəbul olunmasını təklif edib və bununla bağlı təkliflər paketini açıqlayıb. Təşkilat beynəlxalq əlaqələrin qurulmasına da ciddi yanaşır. Qurumun üzvləri Türkiyədə olarkən qardaş ölkənin onlayn media orqanları ilə əlaqələr yaradıb. Biz ölkənin internet KİV müstəvisini ciddi izləyirik və hər ay hesabat hazırlayırıq. Təşkliat iki dəfə ölkədə internet medianın vəziyyəti barədə sorğu keçirib və nəticələri KİV-də kifayət qədər rezonans doğurub. Bu il üçün xeyli planlarımız var. Onlayn media ilə bağlı maarifləndirici təlimlərin keçirilməsini planlaşdırırq. Eyni zamanda internet jurnalistlərinin Forumunu təşkil etmək istəyirik.

İlqar Elfioglu future

RETROSPEKTİVA – İlqar Əlfioğlu: “İndi söz su qiymətinədir deyə, yaxşı jurnalist qalmayıb.”

İlqar Elfioglu

1905.az portalının suallarını böyük  telejurnalist, yazar, tərcüməçi İlqar Əlfioğlu cavablandırır.

– İlqar müəllim, yaradıcı insanların ömür yolunun içində yaradıcılıq yolu da olur. Yaradıcılıq yolu müəyyən yaşdan başlanır və əgər insanın, yaradıcı insanın bəxti gətirsə, dünyadan köçdüyü ana qədər davam edir. Bu yolun auditoriyaya tanış mənzilləri də olur, ancaq yaradıcı insanın özünə bəlli olan dayanacaqları da… Əvvəlcə, “Dalğa”ya qədərki yaradıcılıq yolunuzdan danışın mümkünsə.

– Ümumiyyətlə, xislətində yaratmaq olan insan əslində, yaradanda yaşayır. Xoş o adamın halına ki, Allah ona yaratmaq qabiliyyəti, bəndələr də bu qabiliyyətini reallaşdırmaq imkanı verir. Sözümün canı var: çox vaxt elə olur ki, yaradıcı insan ailəsinin gündəlik qayğıları ucbatından dolanışıq dalınca qaçır, xırdalanıb param-parça olur, bir ömür çapalasa da, ortaya ciddi bir iş qoya bilmir. Onda insan özü də narazı qalır, ona istedad verən Allah da, güc-bəla ilə dolanan ailəsi də. Üstəlik hələ “yazmırsan, yaratmırsan” deyən dostların da tənəsi qulağını yağır eləyir…

Tahir Balıyev

RETROSPEKTİVA – Tahir Balıyev: “Məni tanıyanlar bilirlər ki, dezinformasiyalara qarşı ciddi allergiyam var.”

Tahir-Balıyev

1905.az portalının suallarını sputnik.az saytının redaktoru Tahir Balıyev cavablandırır.

– Media da müxtəlifdir, mediaya aparan yollar da. Necə oldu ki, mediada çalışmağa başladınız?

– Mən Bakı Sosial İdarəetmə və Politologiya İnstitutunda indi 1905.az portalında çalışan Gündüz Nəsibovla bir qrupda oxumuşam. Fikrimcə, 1995-ci il idi, digər bir qrup yoldaşımız İldırım Qocayev “Biznes Press” qəzetində jurnalist işi olduğunu dedi və bizə orada işləməyi məsləhət gördü. O Gündüz müəllimlə mənim savadımıza inandığı üçün bu təklifi etmişdi. Biz təklifi dəyərləndirdik və sözügedən qəzetin baş redaktoru Fuad Babayevlə görüşdük. Bu görüşün nəticəsi olaraq biz həmin qəzetin “Vergilər” səhifəsinin hazırlanmasında iştiraka başladıq. Gizlətmək lazım deyil ki, əvvəlcə bu iş bizə çox ağır gəlirdi.