Beynəlxalq Muğam Mərkəzinin direktoru, Əməkdar artist, tarzən, Özbəkistanın mədəniyyət elçisi Sahib Paşazadə və BMM-nin solisti, Qarabağ Universitetinin müəllimi, Əməkdar artist, nağara ifaçısı Kamran Kərimov Pakistanın Kəraçi şəhərində ikinci dəfə təşkil edilən Dünya Mədəniyyəti Festivalında Azərbaycanı təmsil edirlər.

AZƏRTAC xəbər verir ki, “Art Council Pakistan”ın təşkilatçılığı ilə dekabrın 7-dək davam edəcək festivalda dünyanın 140 ölkəsindən 1000-dən artıq sənətçi çıxış edəcək.

Təşkilat komitəsi və “Art Council Pakistan”ın prezidenti Məhəmməd Əhməd Şah Azərbaycandan gələn qonaq ifaçıları qarşılayaq onlara festivalın xatirə hədiyyələrini təqdim edib. BMM-nin direktoru Sahib Paşazadə qarşılıqlı olaraq Azərbaycan mədəniyyətini təbliğ edən kitab və suvenirləri festival rəhbərliyinə hədiyyə edib. Qlobal bədii forumda azərbaycanlı musiqiçilərin konserti 29 noyabr tarixində reallaşacaq.

Sahib Paşazadə və Kamran Kərimov bu festivalda artıq ikinci dəfədir ki, ölkəmizi təmsil edirlər. Ötən il keçirilən festival zamanı ifaçılar açılış mərasimində zəngin proqramla çıxış edərək Kəraçidə yerləşən İncəsənət Universitetində Azərbaycan alətləri və musiqisi ilə bağlı ustad dərsi keçmişdilər. Azərbaycan muğamı və musiqi alətlərimiz böyük sevgi və maraqla qarşılanmışdı.

Festival çərçivəsində musiqi, teatr və rəqs tamaşaları, təsviri incəsənət nümayişləri, sənətin müxtəlif sahələrini əhatə edən panel müzakirələri və seminarlar təşkil olunur.