Gəncə şəhəri Nizami Gəncəvi Muzeyində Gəncə Şəhər İcra Hakimiyyəti və Gəncə-Daşkəsən Regional Mədəniyyət İdarəsinin təşkilatçılığı ilə “Azərbaycan-Türk bədii təfəkkürünün zirvəsi – Nizami Gəncəvi” mövzusunda elmi-praktiki konfrans keçirilib.

AZƏRTAC-ın bölgə müxbiri xəbər verir ki, əvvəlcə tədbir iştirakçıları Nizami Gəncəvinin məqbərəsini ziyarət edib, əl işlərindən ibarət sərgi və muzeyə baxış keçirib, sonra sağlamlıq imkanları məhdud uşaqlardan təşkil edilmiş “Günəş” rəqs qrupunun ifasında rəqsi izləyiblər.

Tədbir muzeyin konfrans zalında davam edib. Dövlət Himni səsləndirilib, Ulu Öndər Heydər Əliyevin və şəhidlərin əziz xatirəsi bir dəqiqəlik sükutla yad olunub.

Çıxış edən Nizami Gəncəvi Muzeyinin direktoru Teymur Əliyev tədbir haqqında qısa məlumat verib. Sonra Gəncə Şəhər İcra Hakimiyyətinin başçısı Aparatının Şəhərin mədəni irsinin qorunması şöbəsinin müdiri Yadigar Bədəlov, Gəncə Regional Turizm İdarəsinin rəisi Fariz Qarayev, professor Həsənbala Sadıqov, AMEA-nın Gəncə bölməsinin elmi işlər üzrə sədr müavini, filologiya üzrə fəlsəfə doktoru, dosent Əlimuxtar Muxtarov, dosent, tarix üzrə fəlsəfə doktoru Səidə İsmayılzadə, tarix üzrə fəlsəfə doktoru, etnoqraf Nurlana Həmzəyeva və Gəncə Dövlət Tarix Mədəniyyət Qoruğunun elmi işçisi Vəfa Əliyeva çıxış ediblər.

Çıxışlarda bildirilib ki, Ulu Öndər Heydər Əliyev dünya ədəbiyyatının görkəmli nümayəndəsi, dahi Azərbaycan şairi və mütəfəkkiri, bəşər düşüncəsinin qüdrətli söz ustadı Nizami Gəncəvinin zəngin irsinin sistemli şəkildə araşdırılması, qorunması və dünyaya tanıdılması üçün xüsusi diqqət göstərib, bu sahədə mühüm dövlət siyasətinin əsasını qoyub. Prezident İlham Əliyev və Birinci vitse-prezident Mehriban Əliyevanın təşəbbüsləri ilə Nizami irsinin beynəlxalq səviyyədə tanıdılması yeni mərhələyə yüksəlib.

Həmçinin vurğulanıb ki, Nizami Gəncəvi irsi xalqımızın milli sərvətidir. Azərbaycan xalqı hər zaman fəxr edir ki, dünya səviyyəli bu dahinin adı məhz Gəncə şəhəri ilə, Azərbaycan torpağı ilə bağlıdır. Onun yaradıcılığı gənc nəslin mənəvi tərbiyəsində, humanist dəyərlərin aşılanmasında, elmə və biliklərə marağın artırılmasında mühüm rol oynayır.

Tədbirdə fərqlənən bir qrup şəxs təşəkkürnamə ilə mükafatlandırılıb.

Sonda Gəncə Şəhər Uşaq İncəsənət Məktəbi və Gəncə Bülbül adına 3 nömrəli musiqi məktəbinin kollektivi Nizaminin əsərlərindən ibarət konsert proqramı ilə çıxış ediblər.