ՄԱԿ-ի Քաղաքակրթությունների դաշինքի 7-րդ Գլոբալ ֆորումի շրջանակներում՝ Բաքվում անցկացվել է «Մամուլի պրոֆեսիոնալիզմը. արմատական ծայրահեղականության քարոզչության դիմակայության միջոցները» խորագրով նիստ:
Ինչպես հաղորդում է Armenia.Az-ը, նիստի մոդերատոր, Մամուլի և ուսուցման ասոցիացիայի գլխավոր գործադիր տնօրեն Սալլի Ռեյնոլդսը վստահություն է հայտնել, որ անվտանգության ոլորտին հատկացված միջոցները կարող են օգտագործվել ավելի արդյունավետ կրթության մեջ:
Ադրբեջանի նախագահի հասարակական և քաղաքական հարցերով օգնական, նախագահի աշխատակազմի հասարակական և քաղաքական բաժնի ղեկավար Ալի Հասանովը նշել է, որ տարածաշրջանում, որտեղ տեղակայված է Ադրբեջանը, արագորեն տարածվում են բռնությունը, կրոնական անհանդուրժողականությունը և ծայրահեղականությունը:
«Այսօր մենք քննարկում ենք մամուլի դերը արմատական ծայրահեղականության քարոզչության դեմ դիմակայության հարցում: Ափսոսանքով պետք է նշեմ, որ հակամարտությունների ազդեցությանը ենթարկված երկրներում մամուլի գործունեության վեկտորը սխալ է:
Մամուլը վերածում են ծայրահեղականության, բռնության և ռասայական խտրականության մասնիկի: Մամուլն ամենաարդյունավետ միջոցն է միջմշակութային երկխոսության և հանդուրժողականության քարոզման համար:
Երբեմն հակամարտությունների լուսաբանման ժամանակ աշխարհի առաջավոր մեդիա կառույցները նույնպես ենթարկվում են թշնամու իմիջի ձևավորման տրենդի ազդեցությանը: Որոշ ԶԼՄ-ներ Լեռնային Ղարաբաղի հակամարտությանը մոտենում են քաղաքակրթությունների բախման համատեքստում: Այստեղ մենք տեսնում ենք օկուպանդի արդարացման փորձեր: Հակամարտության նախաձեռնողը ներկայացվում է որպես «զոհ», իսկ իսկական զոհը՝ որպես «ագրեսոր»:
Ալի Հասանովն ընդգծել է, որ Հայաստանի մամուլը քարոզում է ատելություն, իսլամաֆոբիա և թուրքաֆոբիա: «Հայաստանի մամուլի զբաղված է Ադրբեջանի «սևացման» աշխատանքով և փորձում է օրինականացնել օկուպացիան:
Հայաստանի նախկին և ներկայիս նախագահները, ԵԽԽՎ-ում այդ երկրի պատվիրակության ղեկավարները միջազգային ամբիոնից հայտարարում են, որ հայերն ու ադրբեջանցիները չեն կարող միասին ապրել: Դրա համար ոչ ոք նրանց չի դատապարտում կամ քննադատում»:
