«Ես զարմացա, երբ ինձ ասացին, որ Հայաստանի նախագահը մի քանի օր առաջ MEDEF-ում իր ելույթի ժամանակ ներդրողներին Հայաստանում ներդրումներ կատարելու հրավիրելու փոխարեն փորձել է անհիմն կերպով վարկաբեկել Ադրբեջանի հեղինակությունը:
Նա խոսել է նորարարությունների մասին: Հայտարարել է, որ Հայաստանը նորարար երկիր է: Անկեղծ ասած՝ Ադրբեջանում ծիծաղում են նման հայտարարությունների վրա: Կա հայտնի մի ասացվածք. «Եթե այդքան խելացի ես, ինչու՞ ես աղքատ»:
Ինչպես հաղորդում է Аrmenia.Az-ը, այս մասին Փարիզում՝ «Ֆրանսիայի ձեռնարկությունների շարժում» կազմակերպության (MEDEF) գործարար խորհրդի անդամների հետ հանդիպման ժամանակ հայտարարել է Ադրբեջանի նախագահ Իլհամ Ալիևը:
«Հայաստանում բնական պաշարների բացակայությունը չի նշանակում, որ այդ երկրի քաղաքացիները պետք է տառապեն դրանից: Աշխարհի զարգացած երկրների մեծ մասը, ներառյալ Ֆրանսիան՝ չունեն բնական ռեսուրսներ: Սակայն, կառավարման ճիշտ քաղաքականության, թափանցիկության, կրթության, գիտելիքների և նորարարությունների շնորհիվ նրանք զարգացնում են իրենց երկիրը: Դրա համար էլ, ֆրանսիական ընկերություններին հեքիաթ պատմելու փոխարեն՝ Հայաստանի նախագահը թող ուշադրություն դարձնի իր երկրի ահավոր վատ տնտեսական վիճակին, որտեղ բնակչության գերակշիռ մասն ապրում է ծայրահեղ աղքատության մեջ:
Հայաստանի պաշտոնական տվյալներով՝ այդ երկիրը տարեկան լքում է 60 հազար մարդ: Իսկ մեր տվյալներով այդ ցուցանիշը կազմում է շուրջ 100 հազար: Եթե այդ երկիրը գրավիչ լիներ, ապա մարդիկ չէին լքի այն», – ասել է Ադրբեջանի նախագահը:
ARMENIA.AZ
14 Մարտի 2017
