ესპანეთის შინაგან საქმეთა მინისტრის ინფორმაციით, ტერაქტის შედეგად 13 ადამიანია დაღუპული და 50-ზე მეტი დაშავებული. მედიის ცნობით კი დაშავებულთა რაოდენობა 80–ს აღწევს, მათგან 15–ის ჯანმრთელობის მდგომარეობა მძიმეა.

სამართალდამცავებმა სავარაუდო ტერორისტი თავდასხმიდან რამდენიმე საათში დააკავეს.

ესპანური მედიის ინფორმაციით, ეჭვმიტანილი დაკავებული დრის ოუქაბირი მაროკოშია დაბადებული, თუმცა ესპანეთში ცხოვრობდა და წარსულში სისხლის სამართლის პასუხისგებაში იყო მიცემული. ამ დროისთვის პოლიცია  მის სოციალურ ქსელებს ამოწმებს. BBC-ის ცნობით კი დაკავებულია კიდევ ერთი ეჭვმიტანილი. აღნიშნულ ინფორმაციას BBC კატალონიის მეთაურ კარლეს პუჩდემონზე დაყრდნობით ავრცელებს.

ადგილობრივი მედიისვე ცნობით, სპეც-ოპერაციის დროს ორმხრივი სროლის შედეგად ერთ-ერთი ეჭვმიტანილის დაიღუპა, თუმცა უცნობია, სულ რამდენი ადამიანი მონაწილეობდა თავდასხმაში. გაზეთი El Periodico–ს ცნობით, ორმხრივი სროლისას  ორი სამართალდამცველი დაიჭრა.

როგორც გამოცემა იუწყება, პოლიციელები ორმხრივ სროლაში თეთრი ფერის ავტომობილ “ფორდ ფოკუსში” მსხდომ პირებთან ჩაერთვნენ. სროლა მას შემდეგ დაიწყო, რაც ავტომობილის მძღოლმა სამართალდამცველების მოთხოვნაზე ავტომობილი არ გააჩერა. 

ტერაქტის შემდეგ ქალაქის ცენტრში ყველა სახის საზოგადოებრივი ტრანსპორტის მოძრაობა აიკრძალა. ტაქსის მძღოლები მოსახლეობას უფასოდ ემსახურებიან. ბარსელონაში ყველა სახის გასართობი ღონისძიება გადაიდო და ქვეყანაში 3 დღიანი გლოვა გამოცხადდა. ესპანეთის საფეხბურთო ჩემპიონატის ფარგლებში შაბათ-კვირას დაგეგმილი ყველა შეხვედრა წუთიერი დუმილით დაიწყება. დღეს კი 12:00 საათზე დაღუპულებს 5 წუთიანი დუმილით მიაგებენ პატივს.

 ბარსელონაში გაემგზავრა ქვეყნის პრემიერ-მინისტრი. 

„ტერორისტები ვერასდროს დაამარცხებენ გაერთიანებულ ერს, რომელიც ირჩევს თავისუფლებას ბარბაროსობის წინაშე. მთელი ესპანეთი დღეს არის მსხვერპლთან და მათ ოჯახებთან“, – წერს ესპანეთის პრემიერ-მინისტრი მარიანო რახოი „ტვიტერში“.