Ankarada Azərbaycan şəhidlərinin xatirəsinə həsr olunmuş “Zəfərlə ruhlanan şeirlər” (Zafer Kokan Şiirler) kitabının təqdimatı olub.

AZƏRTAC xəbər verir ki, təqdimat 27 sentyabr – Anım Günü ilə əlaqədar Türkiyə-Azərbaycan Dostluq, Əməkdaşlıq və Həmrəylik Fondunun (TADİV) dəstəyi ilə Azərbaycanın Ankaradakı Səfirliyinin təşkil etdiyi anım tədbiri çərçivəsində baş tutub.

Nəşrin türkcə tərtibatçısı, şairə Aida Eyvazlı Göktürk tamaşaçılara bildirib ki, kitabın yaradılması ideyası ona həlak olan qəhrəmanların ailələrindən birinə baş çəkərkən gəlib.

O, bildirib ki, Şamaxıda görüş zamanı şəhidin anası ona həlak olmuş oğlu, 19 yaşlı Nazim Zəkərəyevin şeiri olan kağızı verib. “Mən bu şeiri oxuyanda gözlərim yaşardı. Düşündüm ki, Azərbaycanın istedadlı şairi qəhrəmancasına həlak olub. Mən şəhidlərin, qazilərin əsərlərinin də yer aldığı şeirlər toplusu hazırlamağa qərar verdim”, – deyə Aida Eyvazlı qeyd edib.

Onun sözlərinə görə, topluda həm İkinci Qarabağ müharibəsi, həm də 2016-cı ilin aprel döyüşləri şəhidlərinin və qazilərinin şeirləri yer alıb. “Bu şeirləri yazan qəhrəmanlar heç vaxt qələbəyə inamını itirməyiblər”, – deyə o, vurğulayıb.

Azərbaycanın Ankaradakı səfiri Rəşad Məmmədov şəhid olmuş Azərbaycan qəhrəmanlarının xatirəsinin yad edilməsində xidmətlərinə görə Aida Eyvazlı Göktürkə minnətdarlığını bildirib, qardaş Türkiyə ictimaiyyətinin Azərbaycan şəhidləri haqqında məlumatlandırılmasının vacibliyini vurğulayıb.

Ramin Abdullayev

AZƏRTAC-ın xüsusi müxbiri

Ankara