İyunun 5-də Azərbaycan – Bolqarıstan diplomatik əlaqələrinin 30 illiyi münasibətilə Gənclərin İdman Festivalı keçirilib.

AZƏRTAC verir ki, Bakı İdman Sarayında təşkil edilən tədbirin açılış mərasimində gənclər və idman nazirinin müavini Mariana Vasileva, Bolqarıstanın Azərbaycandakı fövqəladə və səlahiyyətli səfiri Nikolay Yankov, Azərbaycan XİN Avropa İdarəsinin rəis müavini Ruslan Rzayev, Azərbaycan – Bolqarıstan parlamentlərarası əlaqələr üzrə işçi qrupunun rəhbəri Rauf Əliyev çıxış ediblər.

Hər iki ölkənin dövlət himni səsləndirildikdən sonra açılış mərasimi bədii hissə ilə davam edib.

Sonra meydan hər iki ölkənin idmançılarına verilib. Güləş üzrə yarış maraqlı mübarizə və dostluq şəraitində keçib. Həmçinin akrobatika gimnastikası, brekdans və kapoeyra üzrə nümunəvi çıxışlar nümayiş etdirilib.

Festivalın sonunda idmançıların mükafatlandırılma mərasimi keçirilib. Səfir Nikolay Yankov Gənclər və İdman Nazirliyinin İdman şöbəsinin müdiri Elnur Məmmədova, nazir müavini Mariana Vasileva isə Bolqarıstan Gənclər və İdman Nazirliyinin Beynəlxalq əməkdaşlıq şöbəsinin eksperti Marin Mirçevə xatirə kuboku təqdim ediblər. Eyni zamanda, komanda rəhbərlərinə və idmançılara xatirə hədiyyələri verilib.

Xatırladaq ki, iyunun 5-də Azərbaycanla Bolqarıstan arasında diplomatik əlaqələrin qurulmasının 30 illiyi tamam olur. Bu münasibətlə təşkil edilən festivalda iştirak etmək üçün Bolqarıstandan idman nümayəndə heyəti ölkəmizə səfər edib.