Yurda sarı çəkir bizi xəyallar,
Vətəndən yaz, Vətəndən yaz, qardaşım!
Gözümüzdə çözələnir o yollar,

O yollarda itəndən yaz, qardaşım!
Vətəndən yaz, Vətəndən yaz, qardaşım!

Gecə-gündüz bizi o yurd haraylar,
Oğuzları Dədəm Qorqud haraylar,
İntiqama bizi Boz Qurd haraylar,
Düşmən üstə gedəndən yaz, qardaşım!
Vətəndən yaz, Vətəndən yaz, qardaşım!

Bu nə hikmət, nə möcüzə, sirr imiş?
İndi bildik Vətən bizə pir imiş,
Bir mahalın dərdi-səri bir imiş,
Dərdə-qəmə batandan yaz, qardaşım!
Vətəndən yaz, Vətəndən yaz, qardaşım!

Yurd həsrəti qəlbimizin qubarı,
Vətən idi millətimin vüqarı,

Qışa döndü ömrümüzün baharı,

Bu dünyanı qatandan yaz, qardaşım!
Vətəndən yaz, Vətəndən yaz, qardaşım!