Martın 31-də “İçərişəhər” Dövlət Tarix-Memarlıq Qoruğu İdarəsinin təşkilatçılığı ilə Quba Soyqırımı Memorial Kompleksində  “31 Mart Azərbaycanlıların Soyqırımı Günüdür” mövzusunda elmi–praktik seminar keçirildi. Seminarda “İçərişəhər” Dövlət Tarix-Memarlıq Qoruğu İdarəsinin, “1905.az” portalının, “Miras” İctima Birliyinin əməkdaşları, alimlər və Qərb Universitetinin tələbələri iştirak edirdilər.

Tədbir iştirakçıları əvvəlcə Quba soyqırımı məzarlığını ziyarət etdilər. Arxeoloq, tarix üzrə fəlsəfə doktoru Qəhrəman Ağayev soyqırım məzarlığı haqqında ətraflı məlumat verdi. Daha sonra Quba Soyqırımı Memorial Kompleksində  elmi-praktik seminar öz işinə başladı. Seminarı giriş sözü ilə tarix üzrə fəlsəfə doktoru, professor Kamil İbrahimov açdı. Sonra “İçərişəhər” Dövlət Tarix-Memarlıq Qoruğu İdarəsi rəisinin köməkçisi, tarix üzrə elmlər doktoru  Vəfa Quliyeva, “1905.az” portalının direktoru, siyasi elmlər üzrə fəlsəfə doktoru Fuad Babayev, tarix üzrə fəlsəfə doktoru Aqil Şahmuradov, tarix üzrə elmlər doktoru Şahin Fazil, filologiya üzrə elmlər doktoru, professor Alxan Bayramoğlu, tarix üzrə elmlər doktoru Xeyirbəy Qasımov, “Miras” İctimai Birliyinin rəhbəri, tarix üzrə fəlsəfə doktoru Fariz Xəlilli,  “İçərişəhər” Tarixi Muzeyinin direktoru Nəcəf Quliyev çıxış edərək 1918-ci ilin mart-aprel aylarında ermənilərin azərbaycanlılara qarşı törətdikləri soyqırım hadisəsi, onun nəticələri və dərsləri haqqında ətraflı məlumat verdilər.