Rusiya paytaxtında Beynəlxalq Təhlükəsizlik üzrə IX Moskva Konfransı keçirilir.

AZƏRTAC xəbər verir ki, Azərbaycanı konfransda müdafiə nazirinin müavini, general-leytenant Kərim Vəliyev təmsil edir.

RF Müdafiə Nazirliyi tərəfindən təşkil olunmuş forumda 600-dən artıq qonaq iştirak edir. İştirakçılar iki gün ərzində Avropa, Asiya, Afrika, Yaxın Şərq və Latın Amerikasında qlobal və regional sabitlik problemlərini, təhlükəsizliyin müxtəlif aspektlərini, yeni koronavirus infeksiyası ilə mübarizədə hərbçilərin rolunu müzakirə edəcəklər.

Konfransın açılışında Rusiya Federasiyasının Prezidenti Vladimir Putin və BMT-nin Baş katibi Antonio Quterreş forum iştirakçılarını və qonaqları salamlayıb.

Konfrans çərçivəsində yeddi plenar iclas təşkil olunacaq.

Xatırladaq ki, Beynəlxalq Təhlükəsizlik üzrə Moskva Konfransı 2012-ci ildən başlayaraq hər il keçirilir.

Fəridə Abdullayeva

AZƏRTAC-ın xüsusi müxbiri

Moskva