Siyasi Məsələlər Komitəsinin 1 oktyabr 2014-cü il tarixli iclasında “Azərbaycanın Dağlıq Qarabağ və digər işğal edilmiş ərazilərində gərginliyin artması” adlı məruzənin hazırlanması üzrə məruzəçi təyin edildi.

Strasburq, 1 oktyabr 2014-cü il  AŞPA-da Azərbaycan nümayəndə heyətinin üzvü Elxan  Süleymanovdan aldığımız məlumat:

 Bu gün, 1 oktyabrda AŞPA Siyasi Məsələlər Komitəsinin iclası keçirildi. İclasda mənim təqdim etdiyim  qətnamə layihəsi ilə bağlı Büronun 2 sentyabrda qəbul edilmiş və 29 sentyabrda plenar sessiyada təsdiq  edilmiş qərarı əsasında “Azərbaycanın Dağlıq Qarabağ və digər işğal edilmiş ərazilərində gərginliyin artması” adlı məruzənin hazırlanması  üçün məruzəçi təyin edildi. Yeni təyin edilmiş  məruzəçi britaniyalı deputat Robert Volterdir.  Qeyd etməliyəm ki, Ermənistan hakimiyyəti, AŞPA-dakı  ermənipərəst qruplaşmalar, dünyanın aparıcı güc mərkəzlərindəki ermənipərəst qüvvələr  Ermənistanın işğalçılıq siyasətini ifşa edən, bu  işğalçı dövlətə qarşı sanksiyaların tətbiq  edilməsini tələb edən hər hansı bir sənədin nəinki qəbul edilməsinin, hətta hazırlanmasının qarşısını  almaq üçün bütün imkanlarını səfərbər ediblər.  Lakin biz ümid edirik ki, məruzəçi “Azərbaycanın  Dağlıq Qarabağ və digər işğal edilmiş ərazilərində gərginliyin artması” adlı sənədi  hazırlayarkən Ermənistan hakimiyyətinin, AŞPA-dakı ermənipərəst qüvvələrin, ermənipərəst aparıcı  güc mərkəzlərinin təzyiqlərinə baxmayaraq obyektiv  məruzə hazırlayacaq, Ermənistanın işğalçı dövlət  olduğunu və işğal etdiyi ərazilərdə mülki əhaliyə qarşı kütləvi şəkildə cinayətlər törətdiyini bir daha dünya ictimaiyyətinə çatdıracaq, məruzəni  qətnamə hissəsində ilk dəfə olaraq işğalçı Ermənistana qarşı konkret sanksiyaların tətbiq edilməsini tələb edəcək.

 Elxan Süleymanov