Aktual Xəbər

Cümhuriyyətin 100 illiyi ərəfəsində baş tutan 8-ci Sabir qiraət müsabiqəsi

Elxan Süleymanov: “Sabir yaradıcılığı çox uca bir zirvədir və dünya durduqca yerində qalacaq”

Şamaxının millət vəkili Elxan Süleymanovun təşəbbüsü ilə 2011-ci ildən indiyədək hər il keçirilən Sabir bədii qiraət müsabiqəsi 2018-ci ildə də uğurla baş tutdu.

Şamaxının bütün orta ümumtəhsil məktəblərində, kollec və liseylərində bir ay öncədən başlayan laureat seçimlərinin mayın 25-də final mərhələsi oldu.

Şamaxı Musiqi Məktəbinin akt zalında keçirilən qaliblərin mükafatlandırılması mərasimi də bu il də yaddaqalan oldu.

Musavat.com-un xəbərinə görə, aparıcı – Sabir şeirlərinin mükəmməl qiraətçisi, gənc aktyor Səfa Mehdi tədbiri böyük çoşğu ilə dahi şairin şeirlərindən birini səsləbdirməklə açdı.

O, Sabir yaradıcılığının vurğunu kimi, bu cür müsabiqəni ənənəyə çevirdiyinə, Sabirin xatirəsini uca tutduğuna, onun yaradıcılığının geniş təbliğini həyata keçirdiyinə görə Elxan Süleymanova minnətdarlığını bildirdi.

Müsabiqənin münsiflər heyətinin digər üzvü Asif Hacıyev çıxışında dedi ki, 8-ci Sabir bədii qiraət müsabiqəsinin həm də Cümhuriyyətimizin 100 illiyi ərəfəsində baş tutması ikiqat sevincdir, ikiqat bayram bayram əhvalı yaradır. O, müsabiqəyə qatılan yüzlərlə şagird arasından 1-ci, 2-ci və 3-cü yerlərin qaliblərinin müəyyənləşdirilməsinin heç də asan olmadığını qeyd etdi.

Növbəti çıxışçı – Şamaxının icra başçısının müavini Qasım Qasımov dedi:-“Biz düz 8 ildir bu gözəl ab-havanı yaşayırıq. Növbəti qiraət müsabiqəsinin Cümhuriyyətin 100 illik yubileyi ərəfəsində olması çox əlamətdardır.

Xeyriyyəçi Elxan Süleymanov deputat seçildiyi vaxtdan indiyədək Şamaxıda elə işlər görüb ki, bunun izləri rayonda daim qalacaq. O, Şamaxıda onlarla Sabir bulağı çəkdirib, Ərçiman və Məlcək kəndlərində müasir tipli məktəblər tikdirib, 10-dan çox yaxın məktəb binasını təmir etdirib, əlaçı şagirdlərə yüksək təqaüd verib, Sabirin, Seyidəzim Şirvaninin abidələrini ucaldıb, Şamaxı ensikplopediyasını çap etdirib. Və 2011-ci ildən bəri hər il keçirilən Sabir qiraət müsabiqəsi dahi şairin təbliğində misilsiz xidmətdir. Bu, eyni zamanda Şamaxı təhsilinə, Şamaxı məktəblilərinə stimuldur. Şamaxı çox millət vəkilləri görüb, rayonun xeyli imkanlı adamları da var. Amma Sabirə sanki yiyə duran yox idi. Elxan Süleymanov onun adının əbədiləşdirilməsi üçün çox böük işlər görüb.

Bütün bunlara görə Elxan müəllimə Şamaxı ictimaiyyəti adından çox sağ olun deyirəm. Arzu edirəm ki, bu müsabiqə daim yaşasın”.

Müsabiqənin münsiflər heyətinin üzvü, Sabirin ev muzeyinin direktoru Rəqsanə Xəlilova da çıxışında bu projenin önəmindən danışdı, müsabiqənin təşəbbüskarına minnətdarlığını bildirdi.

Münsiflər heyətinin digər üzvü, filoloq, professor Nadir Abdullayev Sabir yaradıcılığının çox dərin bir məna kəsb etdiyini, daha böyük təbliğinə ehtiyac duyulduğunu dedi: “Elxan Süleymanovun təşəbbüsü sayəsində hər il Sabir yaradıcılığı bu cür gündəmə gəlir, təbliğ olunur”.

N.Abdullayev Şamaxı məktəblərində çalışan dilçiləri, ədəbiyyatçıları Sabir yaradıcılığını şagirdlərə daha səlis, ədəbi qaydalar üzrə tədris etməyi tövsiyyə etdi. 
Daha sonra münsiflər heyətinin üzvü Nəzrin Əfəndiyeva çıxış etdi. Onunla bağlı qeyd edək ki, Nəzrin Əfəndiyeva 2011-ci ildə keçirilən ilk Sabir qiraət müsabiqəsinin qalibi olub. BDU-nun tələbəsi olan N.Əfəndiyeva ilk uğurlarının, təhsilə ikiqat bağlanmasının məhz bu qiraət müsabiqəsi sayəsində olduğunu bildirdi. O, çox səlis bir nitqlə bu gün özünün 8-ci qiraət müsabiqəsində münsiflərdən biri olmasından qürur duyduğunu bildirdi.

Sonda çıxış edən deputat Elxan Süleymanov barəsində söylənən xoş sözlərə görə minnətdarlığını bildirdi. O, ilk müsabiqə qalibi olan Nəzrin Əfəndiyevanın bu gün münsiflər heyətinin üzvü kimi çıxış etməsinin önəmli hadisə olduğunu dedi: “Tam səmimiyyətlə deyirəm, bu məni kövrəldir. Sabir yaradıcılığı böyük bir dünyadır. Bu, əsrlər boyu yaşayacaq, təbliğ olunacaq, araşdırılacaq. İki zirvə var dünyada. Dağ zirvəsi, bir də sənət və insanlıq zirvəsi. Dağ zirvəsi nə zamansa vulkan püskürər, zəlzələ olar dağılar, amma sənət zirvəsi, kamil insan zirvəsi heç zaman eməz. Sabir söz sənəti, yaradıcılığı çox uca bir zirvədir və dünya durduqca yerində qalacaq. Çox əlamətdar olan bir məqam da odur ki, 8-ci qiraət müsabiqəmiz Cümhuriyyətimizin 100 illiyi ərəfəsində reallaşdı”.

Elxan Süleymanov dedi ki, sovetlər dönəmindən mədəniyyət sahəsində çalışıb, müsabiqə, festival keçirilməsi qaydaları haqda fəqrli düşüncədədir: “Sovetlər dönəmində böyük müsabiqələrə, festivallara laureatların seçimi kəndlərdən, rayonlardan başlayırdı, sonra şəhırlərdə, yekunda mərkəzdə keçirilirdi. Biz 8 ildir ki, Şamaxının ən ucqar kəndini də əhatə edən Sabir qiraət müsabiqəsi keçiririk. Bir neçə il öncə Respublika üzrə də Sabir müsabiqəsi keçirdik. Bu gün mənim əlaçı və Sabir qiraət müsabiqəsi üzrə təqaüdçülərimin sayı artıq 150 olur. Təqaüdçülərimdən 14-ü artıq tələbədir. Qürur duyuram bununla”.

Elxan Süleymanov təəssüf hissi ilə qeyd etdi ki, Münsiflər heyətinin sədri, ustad şair Musa Yaqub səhhəti ağır olduğundan builki mükafatlandırma mərasiminə qatıla bilməyib: “Allahdan uşaqlıq dostum Musa Yaquba şəfalar diləyirəm. Tədbirdən dərhal sonra gedib ona bir daha baş çəkəcəm. Musa müəllim tədbirdə iştirak edə bilməsə də, qaliblərə bu il də verilən diplom Musa Yaqubun imzası ilə təqdim olunur. Hər qalibimiz bunu daim uca tutmalıdır”.
Yekunda qaliblərə diplomlar və mükafatları təqdim edildi. 
Bu ilki müsabiqənin qalibləri:

Həvəsləndirici yerlər:
1. Eyyubova Laləzar Elnur qızı
2. Abdullayeva Jalə Cəmil qızı
3. Musayeva Pərvanə Ceyhun qızı
4. Qədimov Adil Aqil oğlu

3-cü yer:

1.Hacıyeva Zöhrə Samir qızı
2. Qəhrəmanova Nərgiz Xalid qızı
3. Uklein Maksim Aleksandroviç

2-ci yer:
1. Şıxıyev Riyad Laçın oğlu
2. Adıgözəlli Ayşən İlham qızı.

1-ci yer
– İsgəndərov Eltac İsgındər oğlu

 

http://musavat.com/news/cumhuriyyetin-100-illiyi-erefesinde-bas-tutan-8-ci-sabir-qiraet-musabiqesi_529570.html