Tutaq ki, Azərbaycan səfirliyinin və ya konsulluğunun fəaliyyətdə olduğu hansısa ölkədə gənc bir araşdırmaçı Ermənistanın Azərbaycana təcavüzü ilə bağlı elmi iş, məsələn, diplom işi yazmaq qərarına gəlir.

Və üz tutduğu mənbələr sırasında diplomatik nümayəndəliyimizin saytı da olur. Gəlin, belə bir hadisənin baş verə biləcəyini istisna  etməyək. Görəsən, həmin yarıməsatiri araşdırmaçı həmin ölkədəki “diplomatik” saytımızdan bu mövzu ilə bağlı nəsə tapa bilərmi?

 İkinci yazı

“DİPLOMATİK” SAYTLAR VƏ ERMƏNİ TƏCAVÜZÜNDƏN “DİPLOM İŞİ”

Azərbaycan Respublikasının xarici ölkələrdə 79 diplomatik nümayəndəliyi, bu nümayəndəlikləri cəmi 60 saytı var.  Bosniya və Hersoqovina, Braziliya, Kuba, Qırğızıstan, Litva, Liviya, Monteneqro, Sloveniya, Suriyadakı səfirliklərin, UNESCO yanında daimi nümayəndəliyin, Təbriz, Sankt Peterburq və Yekaterinburqdakı Baş Konsulluğun və  Genuyada, Santa Fedə fəaliyyətdə olan Fəxri Konsulluqların saytı yoxdur. Mövcud olan 60 saytdan da bəzilərinin qaraçuxası yatıb. Məsələn, Azərbaycanın Polşadakı Səfirliyinin saytı açılmır və Gürcüstan Səfirliyinin saytı “təmir”ə bağlanıb. Yerdə qalır 58 sayt.

Bəs bu saytlar bizim Qarabağ dərdimizdən yazırmı?

İlkin araşdırma göstərir ki, Azərbaycanın Avstriya, İsveç və Türkmənistandakı səfirlikləri, Dubay və İstanbuldakı baş konsulluqları və Ştuttqartdakı Fəxri konsulluğu öz saytlarında Qarabağ mövzusuna yer ayırmayıb.

Beləliklə, xarici ölkələrdə fəaliyyət göstərən diplomatik nümayəndəliklərimizin altısı öz saytlarında ümumiyyətlə Qarabağ problemindən yazmır.

Bu mıvzuda yazan saytlarda necə informasiyalar mütəmadi olaraq yenilənirmi?

Azərbaycanın diplomatik nümayəndəliklərinin saytlarının çoxunda Qarabağ haqqında ayrıca bölmə olmasına baxmayaraq, bu məlumatlar daimi şəkildə yenilənmir. Belə ki, danışıqlar prosesinin gedişi, problemlə bağlı keçirilmiş görüşlər təəssüf ki, həmin bölmələrdə işıqlandırılmır. Hərçənd ki, bəzi səfirliklərimizin saytlarında sosial şəbəkələr vasitəsilə məlumatlar müntəzəm olaraq yenilənir. Məsələn, Azərbaycanın Amerika Birləşmiş Ştatları, İtaliya, Cənubi Koreya, Argentina və Avstraliyadakı səfirlikləri tvitter sosial şəbəkəsinin daimi istifadəçiləridir.

Digər bir məqam isə mövzu ilə əlaqədar olan müvafiq bölmələrdəki məlumatların yetərincə dolğun olub olmaması ilə bağlıdır. Azərbaycanın “qan yaddaşı” heç də bütün saytlarda eyni dərəcədə işıqlandırılmır. Saytlarda yerləşdirilmiş məlumatları dolğunluq dərəcəsinə görə qruplaşdırdıqda aşağıdakı mənzərə meydana gəlir. Qeyd etmək istərdik ki, bu qruplaşdırılma məlumatların həcminə, təsnifatına və aktuallığına görə aparılıb.

Bəzi “diplomatik” saytlar Ermənistanın  təcavüzündən söz açmaq üçün ya Xarici İşlər Nazirliyinin rəsmi səhifəsinə yönlənir, ya da başqa müvafiq saytlara keçidlərdən bəhrələnir. Almaniya, Belçika, Fransa orta bölmədə verilən digər diplomatik nümayəndəliklərin saytlarında kiçik həcmdə məlumatlar yerləşdirilib.

Adından da göründüyü kimi məlumatlarla yetərincə təmin olunmuş saytlar həm təsnifat, həm də həcm baxımından qənaətbəxşdir. Belə ki, burada yerləşdirilmiş materiallar mövzuya uyğun olaraq qruplaşdırılaraq Qazaxıstan, İtaliya, Amerika və qeyd olunmuş digər səfirliklərin saytlarında olduğu kimi tarixi arayış, Ermənistanın Azərbaycana qarşı silahlı təcavüzü: səbəbləri  və sonrakı mərhələləri,  BMT qətnamələri, münaqişənin hüquqi aspektləri, münaqişənin nəticələri, 31 mart – azərbaycanlıların soyqırımı günü, erməni terrorizmi, Xocalı soyqırımı, münaqişənin tarixi və nizamlanma prosesi, Ermənistanın Azərbaycana təcavüzü nəticəsində Azərbaycanın məruz qaldığı iqtisadi ziyan kimi bölmələr halında təsnifləşdirilib.

Minimum	Orta	Yetərincə
AR-nın Los Ancelesdəki Konsulluğu	AR-nın Almaniyadakı Səfirliyi	AR-nın ABŞ-dakı Səfirliyi
AR-nın Argentinadakı Səfirliyi	AR-nın Belçikadakı Səfirliyi	AR-nın Avstraliyadakı Səfirliyi
AR-nın Bolqarıstandakı Səfirliyi	AR-nın NATO yanında Nümayəndəliyi	AR-nın Belarusdakı Səfirliyi
AR-nın Cənubi Afrika Respublikasındakı Səfirliyi	AR-nın Fransadakı Səfirliyi	AR-nın Böyük Britaniyadakı Səfirliyi
AR-nın İndoneziyadakı Səfirliyi	AR-nın Xorvatiyadakı Səfirliyi	AR-nın Çexiyadakı Səfirliyi
AR-nın Rumıniyadakı Səfirliyi	AR-nın İrandakı Səfirliyi	AR-nın Çindəki Səfirliyi
	AR-nın İspaniyadakı Səfirliyi	AR-nın Estoniyadakı Səfirliyi
	AR-nın İsveçrədəki Səfirliyi	AR-nın Avropa Şurası yanında Daimi Nümayəndəliyi
	AR-nın Kanadadakı Səfirliyi	AR-nın Batumidəki Baş Konsulluğu
	AR-nın Cənubi Koreyadakı Səfirliyi	AR-nın Hindistandakı Səfirliyi
	AR-nın Küveytdəki Səfirliyi	AR-nın İordaniyadakı Səfirliyi
	AR-nın Aktaudakı Baş Konsulluğu	AR-nın Cenevrə şəhərindəki BMT bölməsi və digər Beynəlxalq Təşkilatlar yanında Daimi Nümayəndəliyi
	AR-nın Latviyadakı Səfirliyi	AR-nın İtaliyadakı Səfirliyi
	AR-nın Meksikadakı Səfirliyi	AR-nın Qazaxıstandakı Səfirliyi
	AR-nın Mərakeşdəki Səfirliyi	AR-nın Qətərdəki Səfirliyi
	AR-nın Moldovadakı Səfirliyi	AR-nın Macarıstandakı Səfirliyi
	AR-nın Rusiyadakı Səfirliyi	AR-nın Malayziyadakı Səfirliyi
	AR-nın Slovakiyadakı Fəxri Konsulu	AR-nın Misirdəki Səfirliyi
		AR-nın Niderlanddakı Səfirliyi
		AR-nın Özbəkistandakı Səfirliyi
		AR-nın Pakistandakı Səfirliyi
		AR-nın Serbiyadakı Səfirliyi
		AR-nın Türkiyədəki Səfirliyi
		AR-nın Ukraynadakı Səfirliyi
		AR-nın Yaponiyadakı Səfirliyi
		AR-nın Yunanıstandakı Səfirliyi

 

 

 

Beləliklə, internet səhifələrin demək olar ki, çoxu Ermənistanın Azərbaycana qarşı təcavüzü mövzusuna həssaslıqla yanaşaraq müvafiq olaraq ona uyğun bölmələr yaradıb. Lakin Rumıniya, Cənubi Afrika Respublikası və Argentinada yerləşən səfirliklərimizin saytları  mövzu ilə əlaqədar Xarici İşlər Nazirliyinin internet səhifəsinə “müraciət” edir, oxucunu ora yönləndirir. Bolqarıstanda fəaliyyət göstərən səfirliyimizin saytı da Dağlıq Qarabağ haqqında kiçik bir məlumat verdikdən sonra bizə başqa saytlara keçməyimizi “məsləhət” görür.

Deyə bilərik ki, Azərbaycanın xarici ölkələrdə fəaliyyət göstərən diplomatik nümayəndəlikləri əsasən Ermənistanın Azərbaycana təcavüzü məsələsinə diqqət ayıraraq soyqırımı, azərbaycanlıların deportasiyası məsələlərini bir qədər arxa planda saxlamağa üstünlük verir.

 İndi qalır “diplom işi”ni yazmaq…

Türkan Manaflı