Almaniya Bundestaqının Cənubi Qafqaz parlament qrupunun rəhbəri Karin Ştrents və müavini Yohannes Kahrs mayın 16-da Ermənistan-Azərbaycan, Dağlıq Qarabağ münaqişəsinə dair bəyanatla çıxış ediblər.

Bəyanatda Azərbaycan Respublikasının Milli Məclisinin deputatlarından ibarət nümayəndə heyəti ilə bu mövzuda keçirilmiş görüşə toxunulub və qeyd edilib ki, Almaniya Bundestaqının deputatları azərbaycanlı həmkarlarına münaqişənin sülh yolu ilə həlli prosesinin davam etdirilməsinin vacibliyini bildiriblər. Bundestaqın deputatları qeyd ediblər ki, Almaniyanın ATƏT-ə sədrliyi dövründə mövcud status-kvonun tez bir zamanda aradan qaldırılması üçün yolların tapılması bizim əsas vəzifəmizdir.

Yohannes Kahrsın Almaniyanın xarici işlər naziri Frank-Valter Ştaynmayerin status-kvonun davam etməsinin yolverilməzliyi ilə bağlı mövqeyini dəstəklədiyinin vurğulandığı bəyanatda deyilir: “Təkcə atəşkəs yetərli deyil. Xarici işlər nazirimiz haqlıdır. Silahlar yerə qoyulmazsa və status-kvo qalmaqda davam edərsə, növbəti eskalasiyanın baş verməsi yalnız zaman məsələsidir. Bu, həll yolu ola bilməz”.

AZƏRTAC