Rusiyanın Belqorod vilayətində hərbi təyyarənin qəzaya uğraması nəticəsində 74 nəfər, o cümlədən 65 ukraynalı əsir həlak olub.

AZƏRTAC xəbər verir ki, bu barədə Rusiya Müdafiə Nazirliyi məlumat yayıb. Məlumata görə, “İl-76” hərbi nəqliyyat təyyarəsi Moskva vaxtı ilə saat 11:00 radələrində planlaşdırılmış uçuşu yerinə yetirərkən qəzaya uğrayıb. Təyyarədə dəyişdirmək üçün aparılan 65 ukraynalı əsir, həmçinin 6 ekipaj üzvü və 3 müşayiətçi olub.

Belqorod qubernatoru Vyaçeslav Qladkov bildirib ki, təyyarədə olanların hamısı ölüb. Onun sözlərinə görə, yerdə dağıntı yoxdur.

Qəzanın səbəbləri hələlik rəsmi olaraq açıqlanmayıb.

13:38

Rusiyanın Belqorod vilayətində “İl-76” hərbi nəqliyyat təyyarəsi qəzaya uğrayıb.

AZƏRTAC xəbər verir ki, bu barədə Rusiya mətbuatı məlumat yayıb. Belqorod vilayətinin qubernatoru Qladkov teleqram kanalında Koraçansk rayonunda hadisə baş verdiyini və hazırda ora getdiyini yazıb.

Rusiya Müdafiə Nazirliyinin məlumatına görə, təyyarədə Ukrayna Silahlı Qüvvələrinin əsir götürülmüş 65 hərbi qulluqçusu olub və onlar mübadilə üçün Belqorod vilayətinə aparılırdı.

Hadisə yerinə həkimlər və hüquq-mühafizə orqanlarının əməkdaşları göndərilib.

Fəridə Abdullayeva

AZƏRTAC-ın xüsusi müxbiri

Moskva