Qərbi Zəngəzur ərazilərində 200 tarixi əhəmiyyətli türk kənd və şəhərləri dağıdılıb.

AZƏRTAC xəbər verir ki, bunu AMEA A.A.Bakıxanov adına Tarix İnstitutunun əməkdaşı Faiq İsmayılov söyləyib.

O deyib: “Tarixdən məlumdur ki, Qərbi Azərbaycan ərazisinin əzəli yerli sakinləri Azərbaycan türkləridir. Halbuki, ermənilər bu ərazilərdə çar Rusiyasının təşəbbüsü ilə tarixin müəyyən mərhələlərində müxtəlif ölkələrdən köçürülərək məskunlaşdırılıb. İndiki Ermənistan, eləcə də Qərbi Zəngəzur ərazilərinə ermənilər XIX əsrin sonu XX əsrin əvvəllərində çar Rusiyası tərəfindən İrandan və Türkiyədən, həmçinin Yunanıstan, Suriya, Fransa və digər ərazilərdən gətiriliblər. Bu baxımdan Qərbi Azərbaycanın müxtəlif şəhərlərinə məskunlaşdırılan ermənilər dil, ləhcə və xarakter baxımından bir-biriləri ilə kəskin fərqlənirlər. Məsələn, İrəvanda yaşayan ermənilər Mehridə, Gorusda və Qarabağda yaşayanların dillərini çətin anlayırlar”.