Azərbaycan Ordusu işğal olunmuş torpaqlarını istənilən an azad etməyə qadirdir. Ermənistan silahlı qüvvələrinin sentyabrın 21-də Ermənistan-Azərbaycan dövlət sərhədinin Tovuz rayonu istiqamətində növbəti təxribatı daxili auditoriyaya hesablanmış bir addımdır.

Bu fikirləri ukraynalı hərbçi, ehtiyatda olan polkovnik-leytenant Aleksey Şvaryov AZƏRTAC-a məxsusi açıqlamasında söyləyib.

Onun sözlərinə görə, Ermənistanın baş naziri Nikol Paşinyanın ölkə daxilində nüfuzu aşağı düşdüyündən o, əhalinin diqqətini münaqişəyə yönəltmək, bununla da hakimiyyətini qorumaq istəyir.

“Bu gün Azərbaycanın nizamlı, müasir silahlarla təchiz olunmuş peşəkar ordusu var. Əgər Ermənistan Azərbaycanın işğal olunmuş ərazilərini sülh yolu ilə azad etmək istəmirsə, Azərbaycan Ordusu müharibə yolu ilə torpaqları azad etməyə hər an hazırdır”, – deyə ukraynalı hərbçi əlavə edib.

Emil Hüseynli

AZƏRTAC-ın xüsusi müxbiri

Kiyev