Vətənim qürbətdə qalıb,

Bağlanıbdı yolum, Allah!

Vətən üçün kabab olub,

Ağızımda dilim, Allah!

O qasırğa, tufan nəydi?

Zərbələri bizə dəydi,

Fikir-xəyal, qəddim əydi,

Düzəlməyir belim, Allah!

Gözlərimə duman gəldi,

Dövranımız yaman gəldi,

Gör bir necə zaman gəldi:

Ərşə qalxdı zülm, Allah!

Yoxdu gecəm, nə gündüzüm,

Dərd ürəkdə düzüm-düzüm,

Nə bərk imiş mənim üzüm?

Qaçır məndən ölüm, Allah!

Yağı oldu gavır bizə,

Qazdı xəlvət qəbir bizə,

Daha vermə səbir bizə,

Qoy intiqam alım, Allah!