Bala Bəhmənli Kənd Tarix-diyarşünaslıq muzeyi 2003-cü ildə Bala Bəhmənli kənd sakini Əsədov Elçin İbadulla oğlu tərəfindən yaradılıb. Muzey 2006-cı ilə qədər Elçin Əsədovun şəxsi muzeyi kimi fəaliyyət göstərib. Muzeydə 1000-ə yaxın tarixi eksponat  sərgilənir. Eksponatların 90 %-i Elçin Əsədov, 10 %-i isə yerli əhali tərəfindən toplanmışdır.

Elçin Əsədovun müraciətini və toplanılmış kolleksiyaların Azərbaycan tarixi üçün əhəmiyyətini nəzərə alan Azərbaycan Respublikası Mədəniyyət və Turizm Naziri Əbülfəs Qarayev 19 iyun 2006-cı il tarixdə “Füzuli Tarix-Diyarşünaslıq muzeyinin filialının yaradılması haqqında” 247 saylı əmri imzalayır. Əmrdə deyilir ki,  Füzuli rayon İcra Hakimiyyəti Mədəniyyət və Turizm Nazirliyinə müraciət edərək rayonun Bala Bəhmənli kənd sakini, mədəniyyət evinin metodisti Əsədov  Elçin İbadulla oğlu tərəfindən  təşəbbüs göstərilərək muzey təşkil edildiyi bildirilmiş və ona dövlət statusu verilməsini xahiş etmişdir. Toplanmış kolleksiya həqiqətən də Azərbaycan tarixinə və mədəniyyətinə aid çox sayda nadir əşyalardan ibarətdir. Əmrdə qeyd olunur ki, “Mədəniyyət haqqında” Azərbaycan Respublikası Qanununun 28-ci maddəsinin beşinci hissəsini rəhbər tutaraq, habelə bu muzeyin əşyalarının cəbhə bölgəsində etibarlı mühafizəsini təmin etmək məqsədi ilə  bir iyul 2006-cı il tarixdən Füzuli Tarix-Diyarşünaslıq muzeyinin Bala Bəhmənli Kənd filialı yaradılsın.

Əlavə edək ki,  adıçəkilən muzey Qarabağ ərazisində işğaldan sonra yaradılan birinci muzeydir.

Bu gün faktiki olaraq fəaliyyətdə olan muzeylərdən  yalnız Bala Bəhmənli Kənd Tarix-diyaşünaslıq Muzeyinin  internet resursu yaradılmış və mütəmadi olaraq muzeyin əməkdaşları tərəfindən  yeniləndirilir.

 

Hazırladı:

Vüqar Tofiqli

Söz Azadlığını Müdafiə Fondunun icraçı direktoru