Fövqəladə Hallar Nazirliyinin (FHN) Mülki müdafiə qoşunlarının və Xüsusi Riskli Xilasetmə Xidmətinin 35 əməkdaşı ərazilərin minalardan təmizlənməsi və zərərsizləşdirilməsi üzrə növbəti kursu müvəffəqiyyətlə başa vurublar.

FHN-in mətbuat xidmətindən AZƏRTAC-a bildiriblər ki, kursda Rusiya Federasiyası Fövqəladə Hallar Nazirliyinin minatəmizləmə üzrə peşəkar mütəxəssisləri xüsusi təlim keçiblər. Azərbaycan Fövqəladə Hallar Nazirliyinin təşkilatçılığı ilə keçirilmiş kursun təşkilində məqsəd əməkdaşların ərazilərin minalardan təmizlənməsi və zərərsizləşdirilməsi üzrə bilik və bacarıqlarının təkmilləşdirilməsi olub.

Yanvarın 6-dan fevralın 4-dək davam edən kursun sonunda FHN əməkdaşlarına müvafiq sertifikatlar təqdim edilib.

FHN-in Qarabağ Regional Mərkəzinin inzibati binasında keçirilmiş təqdimetmə mərasimində fövqəladə hallar nazirinin müavini general-leytenant Etibar Mirzəyev, Rusiya Federasiyası Fövqəladə Hallar Nazirliyinin minaaxtaranlardan ibarət qrupunun rəhbəri polkovnik Aleksey Zavitski və digər məsul şəxslər iştirak ediblər.

Azərtac