Ayda 2 dəfə çıxan “Avtorevyu” adlı Rusiya jurnalı var. Bakı metrosunun stansiyalarında qəzet köşklərinin fəaliyyətinə xitam verilməzdən əvvəl, bu jurnalın nömrələrini  almaq asan idi. İndi də yəqin abunə yolu ilə əldə edə bilərsiniz bu jurnalın nüsxələrini. Ya da internetə girib http://autoreview.ru/ yazarsınız və istədiyiniz qədər bu jurnalın materiallarını oxuya bilərsiniz.

Hərçənd ki,  jurnalın təzə nömrələrini saytda oxumaq bir qədər problematikdir. Məsələn, mən bu yazını 16 iyunda yazıram. Jurnalın saytındakı müvafiq bölümdə isə yalnız ilin ilk 9 nömrəsi yerləşdirirlib.

Amma köhnə nömrələrlə bağlı problem yoxdur.

Və siz hər biriniz bu jurnalın 2012-ci il üçün 23-cü nömrəsinə rahatca baxa bilərsiniz.  Həmin nömrədə Moskvadan… Dağlıq Qarabağa səyahətdən bəhs edən material hər birimizi düşündürməlidir.

Yazıda təkcə maşınlardan söhbət açılmır. Burada “aeroport”un da görüntüləri var, Eduardo Ernekyan adlı argentinalı biznesmenin “respublika”ya təyyarə bağışlaması haqqında informasiya da.

Ən yeni tariximizin saxtalaşdırılması üçün yazı müəlliflərinin səyləri də öz yerində.

Moskvadan Dağlıq Qarabağa səfər edən “ekspedisiya”nın Kəlbəcərdə olduğunu sübut edən şəkillər, Armen və Svetlan adlı 2 nəfərin həyat hekayəsi və burada qeyd etməyə lüzum görmədiyim başqa məqamlar  bizləri hiddətləndirməyə bilməz…

Amma bu yazıdan xəbərimiz də olmalıdır.

Fuad Babayev, 1905.az