Azərbaycanın İqtisadi Şuranın və ümumilikdə MDB ölkələrinin iqtisadiyyatının fəaliyyətində iştirakı təkcə genişlənmir və möhkəmlənmir, həm də mühüm nəticələr verir.

Bunu AZƏRTAC-a müsahibəsində MDB İcraiyyə Komitəsinin iqtisadi əməkdaşlıq departamentinin direktoru Mixail Mıskin söyləyib.

Onun sözlərinə görə, bu il, Tacikistan Respublikasının MDB-yə sədrlik etməsinə baxmayaraq, Bakıda yüksəksəviyyəli çox sayda tədbir keçirilib. O, xüsusilə böyük və mühüm tədbir olan Dəmir yolu administrasiyaları rəhbərləri Şurasının iclasını, eləcə də Statistika xidmətləri rəhbərləri Forumunu qeyd edib. Forum birinci şəxslərin iştirakı ilə yüksək səviyyədə təşkil olunub.

“Azərbaycan MDB ölkələri ilə əməkdaşlığa maraq göstərir və respublikada iqtisadiyyatın müxtəlif sahələrində toplanmış təcrübə və kompetensiyaları bölüşməyə can atır. Bu, çox sevindiricidir və ümid edirik ki, Azərbaycanın MDB ölkələri ilə əməkdaşlığı gələcəkdə daha da möhkəmlənəcək”, – deyə Mıskin vurğulayıb.

Fəridə Abdullayeva

AZƏRTAC-ın xüsusi müxbiri

Moskva