Qarabağ muzeyləri

Zəngilan rayon Tarix-Diyarşünaslıq Muzeyi rəsmən 1980-ci ildə fəaliyyətə başlayıb. Muzey rayonun mərkəzində, “Oktyabr” küçəsində yerləşirdi. Həmin illərdə  muzey eksponatlarından ibarət buklet də hazırlanıb.

Azərbaycan KP MK Bürosunun 4 yanvar 1980-ci tarixli “Zəhmətkeşlərin kommnust tərbiyəsində muzey işi haqqında” qərarının icrası ilə əlaqədar Zəngilan rayonunda Tarix- Diyarşünaslıq Muzeyinin yaradılmasına start verildi. Bununla bağlı həmin dövrdə Zəngilan rayonunda nəşr olunan “Kənd həyatı” qəzetinin 12 may 1980-cı il tarixli sayında dərc edilən məqalədə qeyd olunurdu ki, “rayonda muzeyin açılması üçün geniş hazırlıq işləri həyata keçirilir. Muzey şəhərin görkəmli yerində, əvvəllər mərkəzi kitabxananın yerləşdiyi binada yaradılacaqdır…” Qəzet yazırdı ki, binada əsaslı təmir işləri görülüb və paralel olaraq eksponatların toplanışına start verilib.

Xatırladaq ki, həmin dövrdə bütün muzeylər standart olaraq üç əsas bölmədə fəaliyyət göstərirdi.

Birinci bölmə rayonun  təbii sərvətlərini, flora və faunasını, ikinci bölmə qədim zamanlardan 1920-ci ilədək olan dövrü  əhatə edirdi. Üçüncü bölmə isə Sovet hakimiyyəti illərində rayonda aparılan abadlıq-quruculuq işlərinə həsr olunurdu.

Muzeyin ilk direktoru Alməmməd Kərimov olub. 1987-1993-cü illər ərzində  Dilarə İsmayılova, 1993-2005-ci illərdə isə  Natiq Rzayev muzeyin direktoru vəzifəsində  çalışıblar. 2005-2012-ci illər ərzində muzeyin fəaliyyəti dayandırıb.  Muzey 2013-cü ildən etibarən  Abşeron rayonu Masazır qəsəbəsində  qaçqın və məcburi köçkünlər üçün salınan  şəhərcikdə fəaliyyətini bərpa edib. 2013-cü ildən muzeyin direktoru vəzifəsinə Göyçək Rəhimova təyin edilib.

Vüqar Tofiqli